Metro53 - لاہور: یونیورسٹی آف لاہور (UOL) نے اعلیٰ تعلیم کے شعبے میں پاکستان کے لیے ایک تاریخی اعزاز حاصل کرتے ہوئے ٹائمز ہائر ایجوکیشن (THE) امپیکٹ رینکنگ 2026 میں ملک بھر میں پہلی پوزیشن حاصل کر لی، جبکہ عالمی سطح پر 71ویں نمبر پر جگہ بنا کر دنیا کی ٹاپ 100 جامعات میں شامل ہونے والی پاکستان کی پہلی یونیورسٹی بن گئی۔
رینکنگ کے مطابق یونیورسٹی آف لاہور نے ملک کی تمام سرکاری اور نجی جامعات میں پہلی پوزیشن حاصل کی، جبکہ کوئی بھی دوسری پاکستانی یونیورسٹی عالمی ٹاپ 300 میں جگہ نہ بنا سکی۔
ٹائمز ہائر ایجوکیشن امپیکٹ رینکنگ اقوام متحدہ کے پائیدار ترقیاتی اہداف (SDGs) کے تحت جامعات کی تدریس، تحقیق، سماجی خدمات، ماحول دوست اقدامات اور عوامی فلاح میں کردار کا جائزہ لیتی ہے۔
یونیورسٹی آف لاہور نے مختلف شعبوں میں بھی نمایاں کارکردگی کا مظاہرہ کیا، جہاں صاف پانی اور نکاسی آب (SDG 6) میں دنیا بھر میں 9ویں، معیاری تعلیم (SDG 4) میں 16ویں اور صحت و فلاح (SDG 3) میں 18ویں پوزیشن حاصل کی۔
اسی طرح موسمیاتی تبدیلی سے نمٹنے (SDG 13) میں 21ویں، بھوک کے خاتمے (SDG 2) میں 32ویں، ذمہ دارانہ پیداوار و استعمال (SDG 12) میں 37ویں اور اہداف کے لیے شراکت داری (SDG 17) میں 76ویں نمبر پر رہی۔
یہ تاریخی کامیابی نہ صرف یونیورسٹی آف لاہور بلکہ پاکستان کے اعلیٰ تعلیمی شعبے کے لیے بھی ایک اہم سنگ میل قرار دی جا رہی ہے، جس سے عالمی سطح پر ملک کی تعلیمی ساکھ مزید مستحکم ہوئی ہے۔
