Metro53 - کنجاہ (ویب ڈیسک) گورنمنٹ ایلیمنٹری سکول چکوری بکھو میں یومِ اقبال کی پروقار تقریب منعقد کی گئی، جس میں اسکول کے طلبہ نے ڈاکٹر علامہ اقبال کی شاعری اور قومی خدمات کو خراجِ عقیدت پیش کیا۔
تقریب کے مہمانِ خصوصی اسسٹنٹ ایجوکیشن آفیسر محمد عرفان صاحب اور ان کے ہمراہ محمد سلیم تابانی صاحب تھے، جنہوں نے پروگرام کی رونق کو دوبالا کیا۔ اس موقع پر تقریب کا آغاز تلاوتِ قرآنِ پاک اور نعتِ رسولِ مقبول ﷺ سے کیا گیا، جس کے بعد طلبہ نے اردو اور انگریزی میں تقاریر پیش کیں۔
طلبہ کی تقاریر نے حاضرین کو محظوظ کیا، جبکہ ایک دلکش ٹیبلو پیش کر کے بچوں نے اپنے فن کا مظاہرہ کیا، جس نے تقریب کو مزید جاذبِ نظر بنایا۔
آخر میں، مہمانِ گرامی نے طلبہ کی محنت اور کارکردگی کو سراہتے ہوئے انعامات تقسیم کیے اور بچوں کی حوصلہ افزائی کی۔ اس تقریب کا مقصد نہ صرف علامہ اقبال کی تعلیمات کو زندہ رکھنا تھا بلکہ طلبہ میں قومی یکجہتی، ادب اور ثقافت کے حوالے سے آگاہی پیدا کرنا بھی تھا۔
اس پروگرام نے اسکول میں تعلیمی اور ثقافتی سرگرمیوں کو فروغ دینے کے ساتھ ساتھ بچوں کی صلاحیتوں کو اجاگر کرنے کا بہترین موقع فراہم کیا۔
