Metro53 - گجرات (ویب ڈیسک )سی ای او ہیلتھ گجرات کی ہدایت پر ڈپٹی ڈسٹرکٹ ہیلتھ آفیسر تحصیل کھاریاں ڈاکٹر وحید کامران کی سربراہی میں عطائیت کے خلاف کارروائی کی گئی۔
نیوزالرٹ کے مطابق، ہیلتھ ٹیم نے یونین کونسل نور جمال، تحصیل کھاریاں کے مختلف علاقوں کا دورہ کیا اور وہاں موجود کلینکس و میڈیکل اسٹورز کا معائنہ کیا۔ کارروائی کے دوران علی ہومیوپیتھک کلینک پر عطائی غضنفر علی کو بغیر اجازت ایلوپیتھک طریقہ علاج کرتے پایا گیا۔ ٹیم نے موقع پر کلینک کو سیل کرتے ہوئے شواہد اکٹھے کیے اور کیس پنجاب ہیلتھ کیئر کمیشن لاہور بھجوا دیا۔
اسی طرح اسامہ کلینک پر عطائی شخص کارروائی کے دوران موقع سے فرار ہوگیا، تاہم کلینک کو فوری طور پر سیل کر کے ضروری شواہد حاصل کر لیے گئے۔
ڈاکٹر وحید کامران کے مطابق کارروائی کے دوران 3 کلینک اور میڈیکل اسٹورز کا معائنہ کیا گیا جن میں سے 2 کو سیل کر دیا گیا۔ انہوں نے کہا کہ عطائیت کے خاتمے تک اس نوعیت کی کارروائیاں جاری رہیں گی تاکہ عوام کو غیر تربیت یافتہ افراد سے تحفظ فراہم کیا جا سکے۔
