Metro53 - گجرات (ویب ڈیسک) پاکستان مسلم لیگ (ن) ضلع گجرات کے سینئر رہنما چوہدری نصیر عباس سدھو نے نیشنل ہائی وے اتھارٹی (NHA) کے اعلیٰ حکام کے ساتھ ایک خصوصی اجلاس میں شرکت کی، جس میں جی ٹی روڈ پر سیوریج نالوں کی تعمیر اور اس منصوبے کی فزیبلٹی پر تفصیلی گفتگو کی گئی۔
اجلاس میں جنرل منیجر این ایچ اے افتخار ساجد، ڈپٹی ڈائریکٹر رانا کاشف، اے سی احمد شیر گوندل، سی او بلدیہ لالہ موسیٰ، ایس ڈی او پبلک ہیلتھ امجد، نائب تحصیلدار سید منصور شاہ، صدر مسلم لیگ (ن) لالہ موسیٰ سجاد بٹ، واپڈا اپگریڈیشن انچارج اور دیگر متعلقہ افسران نے شرکت کی۔
اس منصوبے کے تحت سکائی ویز ریسٹورنٹ سے نیشنل فرنیچر گجرات تک مین جی ٹی روڈ کے دونوں اطراف جدید سیوریج نالے تعمیر کیے جائیں گے۔
ابتدائی تخمینہ ساڑھے 4 ارب روپے لگایا گیا ہے، جبکہ نیسپاک کمپنی کی جانب سے PC-1 رپورٹ مکمل ہونے کے بعد حتمی لاگت طے کی جائے گی۔
چوہدری نصیر عباس سدھو نے بتایا کہ اس منصوبے کی ٹینڈرنگ رواں سال کے اختتام تک مکمل کر لی جائے گی، جس کے بعد جلد از جلد تعمیراتی کام کا آغاز کیا جائے گا۔
