Metro53 - گجرات ( ویب ڈیسک ) پاکستان مسلم لیگ کے مرکزی رہنما چوہدری حسین الٰہی نے اوورسیز کنونشن سے خطاب کرتے ہوئے کہا کہ اوورسیز پاکستانی ضلع گجرات کا اصل سرمایہ اور فخر ہیں۔
ان کا کہنا تھا کہ ہمارا ضلع انہی لوگوں کی محنت اور لگن کی بنیاد پر کھڑا ہے اور چلتا ہے، اور ان کی کاوشیں کسی سے پوشیدہ نہیں ہیں۔
چوہدری حسین الٰہی نے کہا کہ اکثر دیکھا گیا ہے کہ بیرون ملک مقیم دوسری اور تیسری نسلیں اپنے وطن سے دور ہو جاتی ہیں، لیکن گجرات کے تارکین وطن نے نہ اپنا رویہ بدلا اور نہ ہی اپنی شناخت چھوڑی۔ بلکہ وہ پہلے سے بڑھ کر اپنے علاقے اور بزرگوں کی خدمت کر رہے ہیں۔
انہوں نے بتایا کہ حلقہ این اے 63 کے بیشتر دیہات میں بیرون ملک مقیم پاکستانیوں کے تعاون سے ویلفیئر کے کام جاری ہیں۔ یہ لوگ اپنی محنت کی کمائی سے غریب خاندانوں کی مدد اور مسائل کے حل میں اہم کردار ادا کر رہے ہیں، جو کہ ضلع گجرات کے لیے باعث فخر ہے۔
چوہدری حسین الٰہی نے شرکاء سے خطاب میں کہا کہ آج کے کنونشن کا مقصد صرف اور صرف اوورسیز پاکستانیوں کا شکریہ ادا کرنا ہے۔ انہوں نے زور دیا کہ تارکین وطن کی مہمان نوازی اور خدمت کی مثالیں دی جاتی ہیں اور گجرات کی خوشحالی انہی کی انتھک محنت اور کوششوں کا نتیجہ ہے۔
