پیر 6 جولائی, 2026
Metro53 - گجرات (ویب ڈیسک )پنجاب فوڈ اتھارٹی نے خوراک کے معیار کو یقینی بنانے کے لیے ضلع بھر میں مختلف فوڈ پوائنٹس کی انسپکشن کرتے ہوئے متعدد خلاف ورزیوں پر کارروائیاں کیں۔ گزشتہ روز مجموعی طور پر 43 فوڈ پوائنٹس کا معائنہ کیا گیا۔
چیکنگ کے دوران صفائی کے ناقص انتظامات، فوڈ سیفٹی قوانین کی خلاف ورزی اور دیگر بے ضابطگیوں پر 18 فوڈ بزنسز کو اصلاحی نوٹسز جاری کیے گئے، جبکہ 5 فوڈ پوائنٹس پر مجموعی طور پر 54 ہزار روپے جرمانہ عائد کیا گیا۔
کارروائی کے دوران 11 کلوگرام زائدالمیعاد مٹھائیاں اور دیگر ممنوعہ اشیائے خورونوش تلف کر دی گئیں۔ مزید جانچ کے لیے ایک فوڈ سیمپل بھی لیبارٹری تجزیے کی غرض سے حاصل کیا گیا۔
پنجاب فوڈ اتھارٹی کے مطابق عوام کو محفوظ، معیاری اور صحت بخش خوراک کی فراہمی اولین ترجیح ہے، اسی مقصد کے تحت معائنوں اور قانونی کارروائیوں کا سلسلہ آئندہ بھی بلا تعطل جاری رکھا جائے گا۔
