Metro53 - گجرات (ویب ڈیسک ) جلالپور جٹان کے موضع حکیم پور، یونین کونسل لکھنوال میں گندم کے کاشتکاروں کے لیے فیز II ٹریننگ پروگرام منعقد کیا گیا۔ اس تربیتی سیشن کی قیادت اسسٹنٹ ڈائریکٹر ایگریکلچر ایکسٹینشن گجرات ڈاکٹر وجاہت عظیم گوندل اور ایگریکلچر آفیسر ایکسٹینشن جلالپور جٹاں محمد بلال قادری نے کی۔
تربیتی پروگرام میں گندم کی بہتر اور زیادہ پیداوار کے لیے کاشتکاروں کو جدید زرعی تکنیکوں اور عملی رہنمائی سے آگاہ کیا گیا۔ ماہرین نے کسانوں کو تصدیق شدہ اور سفارش کردہ اقسام کے بیجوں کے انتخاب، بروقت کاشت، بیج کی مناسب مقدار، بیج کے علاج، اور موزوں طریقہ کاشت جیسے اہم نکات سے متعلق آگاہ کیا۔
پروگرام کے دوران کھاد کے متوازن استعمال، ابتدائی مرحلے میں ویڈی سائیڈ کے استعمال، پہلی آبپاشی کے درست وقت، بعد از کاشت جڑی بوٹیوں کے کنٹرول اور فصل کو بیماریوں سے محفوظ رکھنے کے عملی طریقوں پر بھی تفصیلی روشنی ڈالی گئی۔
زرعی ماہرین کا کہنا تھا کہ جدید طریقہ کاشت اور مناسب زرعی حکمتِ عملی اپنانے سے گندم کی بہترین پیداوار حاصل کی جا سکتی ہے، جبکہ اس طرح کے تربیتی پروگرام کسانوں کی استعداد بڑھانے میں کلیدی کردار ادا کرتے ہیں۔
