Metro53 - گجرات (ویب ڈیسک )لالہ موسیٰ سے سرگودھا جانے والی چناب ایکسپریس منڈی بہاؤالدین کے علاقےآہلہ شریف کے قریب اس وقت حادثے کا شکار ہو گئی جب ایک ٹریکٹر اچانک ریلوے ٹریک پر آگیا۔
عینی شاہدین کے مطابق ٹرین کی رفتار معمول کے مطابق تھی، تاہم ٹریکٹر ٹرالی کے ڈرائیور نے لیول کراسنگ پر احتیاط نہیں کی، جس کے باعث ٹرین نے ٹریکٹر کو زور دار ٹکر ماری۔ ٹکر اتنی شدید تھی کہ ٹر یکٹر کے پرخچے اُڑ گئے جبکہ ٹرالی بھی بُری طرح متاثر ہوئی۔
خوش قسمتی سے ٹرین کسی بڑے حادثے سے محفوظ رہی اور نہ ہی مسافروں کو جانی نقصان پہنچا۔ لوڈ شدہ ٹرالی کے باوجود ٹرین پٹری سے نہیں اُتری، اور ٹرین کا انجن معمولی نقصان کے ساتھ رک گیا۔ریلوے حکام نے موقع پر پہنچ کر ٹریک کلیئر کر دیا اور حادثے کی تحقیقات شروع کر دی ہیں۔ عوام کو لیول کراسنگ پر احتیاط برتنے کی ہدایت بھی جاری کر دی گئی ہے۔
