عمران خان کے بیٹوں کی والد کی رہائی کیلئے اقوام متحدہ سے اپیل

Metro53 - لندن (ویب ڈیسک )بانی پاکستان تحریک انصاف عمران خان کے بیٹوں قاسم اور سلیمان خان نے اپنے والد کی رہائی کے لیے اقوامِ متحدہ سے رجوع کر لیا ہے۔ دونوں نے اقوام متحدہ کے خصوصی نمائندہ برائے انسدادِ تشدد کے سامنے باضابطہ اپیل دائر کی ہے۔

 نیوز الرٹ کے مطابق ،اپیل میں مطالبہ کیا گیا ہے کہ عمران خان کو درپیش حالات کی فوری تحقیقات کی جائیں، کیونکہ ان کی قید کو پہلے ہی کئی عالمی ادارے بین الاقوامی قوانین کی خلاف ورزی قرار دے چکے ہیں۔ اپیل کے مطابق عمران خان کو قیدِ تنہائی، ناقص خوراک، طبی سہولیات کی کمی اور مسلسل نگرانی جیسے حالات کا سامنا ہے، جو ان کی ذہنی و جسمانی اذیت کا سبب بن رہے ہیں۔

عمران خان کے بیٹوں نے کہا کہ ان کے والد ایسی حالت میں ہیں جو انسانی وقار اور حقوق کے سراسر خلاف ہے۔ انہوں نے اس بات کا حوالہ بھی دیا کہ ایمنسٹی انٹرنیشنل اور امریکی محکمہ خارجہ نے بھی عمران خان کی صحت و سلامتی پر تحفظات کا اظہار کیا ہے۔

اپیل میں اقوام متحدہ سے فوری مداخلت اور رہائی کے لیے مؤثر اقدامات کا مطالبہ کیا گیا ہے۔ اس حوالے سے قاسم خان نے اپنے ایک ٹویٹ میں کہا، "میرے والد کو جمہوریت کے لیے آواز بلند کرنے کی سزا دی جا رہی ہے۔”