Metro53 - جہلم(ویب ڈیسک ) ڈپٹی کمشنر جہلم میر رضا اوزگن کی زیر صدارت اوون سورس ریونیو (OSR) سے متعلق ایک اہم جائزہ اجلاس منعقد ہوا، جس میں مختلف محکموں کے افسران نے شرکت کی۔ اجلاس میں محصولات کی وصولیوں، ریونیو اہداف اور متعلقہ محکموں کی کارکردگی کا تفصیلی جائزہ لیا گیا۔
اجلاس کے دوران مختلف سرکاری محکموں کی جانب سے اوون سورس ریونیو کی موجودہ صورتحال، وصولیوں کی شرح اور محصولات میں اضافے کے لیے کیے جانے والے اقدامات پر تفصیلی بریفنگ دی گئی۔ متعلقہ افسران نے اپنے اپنے شعبوں کی کارکردگی اور مقررہ اہداف کے حصول کے حوالے سے پیش رفت سے آگاہ کیا۔
ڈپٹی کمشنر میر رضا اوزگن نے ہدایت کی کہ تمام محکمے محصولات کی وصولی کے نظام کو مزید مؤثر اور فعال بنائیں اور حکومتی پالیسی کے مطابق مقررہ ریونیو اہداف کے حصول کے لیے عملی اقدامات میں تیزی لائیں۔ انہوں نے کہا کہ محصولات کی بروقت وصولی سے نہ صرف سرکاری وسائل میں اضافہ ممکن ہوتا ہے بلکہ عوامی فلاحی منصوبوں کی تکمیل میں بھی مدد ملتی ہے۔
انہوں نے مزید ہدایت کی کہ ریونیو سے متعلق تمام ریکارڈ کو مکمل طور پر اپ ڈیٹ رکھا جائے اور وصولیوں کے عمل میں شفافیت، میرٹ اور احتساب کو ہر صورت یقینی بنایا جائے تاکہ عوامی وسائل کا درست اور مؤثر استعمال ممکن ہو سکے۔
ڈپٹی کمشنر نے متعلقہ افسران پر زور دیا کہ باہمی رابطے، مربوط حکمت عملی اور مؤثر مانیٹرنگ کے ذریعے اوون سورس ریونیو کے تمام اہداف مقررہ مدت کے اندر مکمل کیے جائیں۔ انہوں نے کہا کہ اس سلسلے میں کسی قسم کی غفلت یا کوتاہی برداشت نہیں کی جائے گی اور کارکردگی کا مسلسل جائزہ لیا جاتا رہے گا۔
اجلاس کے اختتام پر اس عزم کا اظہار کیا گیا کہ ضلع جہلم میں ریونیو وصولیوں کے نظام کو مزید بہتر بنا کر محصولات کے اہداف کے حصول کو یقینی بنایا جائے گا اور عوامی مفاد میں شفاف اور مؤثر انتظامی اقدامات جاری رکھے جائیں گے۔
