Metro53 - گجرات ( ویب ڈیسک )پولیس سرکل سرائے عالمگیر نے منشیات فروشوں اور غیر قانونی اسلحہ رکھنے والوں کے خلاف جاری کارروائی کے دوران 4 ملزمان کو گرفتار کر کے لاکھوں روپے مالیت کی چرس اور اسلحہ برآمد کر لیا۔ کارروائی کے دوران مجموعی طور پر 1.22 کلوگرام چرس اور 3 عدد پسٹل 30 بور قبضے میں لیے گئے۔
تفصیلات کے مطابق ڈی پی او گجرات رانا عمر فاروق کی ہدایت اور ڈی ایس پی سرکل سرائے عالمگیر ڈاکٹر ممتاز احمد میکن کی نگرانی میں ایس ایچ او تھانہ صدر سرائے عالمگیر آفتاب رسول نے اپنے عملہ کے ہمراہ کارروائی کرتے ہوئے بدنام زمانہ منشیات فروش احتشام کو گرفتار کر کے اس کے قبضے سے 1220 گرام چرس برآمد کر لی۔
دوسری کارروائی میں ملزم طلعت محمود سے ایک عدد پسٹل 30 بور بھی برآمد کیا گیا۔ اس کے علاوہ ایس ایچ او تھانہ بولانی انصر ساہی نے اپنے عملہ کے ہمراہ کارروائی کے دوران دو دیگر ملزمان، محمد زیب اور حسن وسیم، کو گرفتار کر کے ان سے ایک ایک عدد پسٹل 30 بور قبضے میں لیا۔
گرفتار ملزمان کے خلاف پولیس نے الگ الگ مقدمات درج کر کے مزید تفتیش کا آغاز کر دیا ہے۔ پولیس حکام نے بتایا کہ یہ کارروائیاں سرکل سرائے عالمگیر میں امن و امان قائم رکھنے اور منشیات و اسلحہ کی غیر قانونی خرید و فروخت روکنے کے لیے کی جا رہی ہیں۔
ڈی پی او گجرات نے اس موقع پر کہا کہ پولیس کا مقصد صرف جرائم پیشہ افراد کو گرفتار کرنا اور عوام کی حفاظت کرنا ہے۔ انہوں نے شہریوں سے اپیل کی کہ وہ مشتبہ سرگرمیوں کی اطلاع فوراً متعلقہ پولیس اسٹیشن کو دیں تاکہ مزید جرائم کو بروقت روکا جا سکے۔
