Metro53 - راولپنڈی(ویب ڈیسک) اڈیالہ جیل میں قید تین ملزمان کی طبیعت اچانک خراب ہونے پر انہیں اسپتال منتقل کیا گیا، تاہم ایک قیدی اسپتال پہنچنے سے قبل ہی انتقال کر گیا۔
جیل ذرائع کے مطابق تینوں قیدیوں کو دل کی تکلیف کے باعث راولپنڈی انسٹی ٹیوٹ آف کارڈیالوجی منتقل کیا جا رہا تھا۔ تاہم ایک قیدی راستے میں ہی دم توڑ گیا، جس کے بعد اسپتال انتظامیہ نے نعش وصول کرنے سے انکار کر دیا۔
ذرائع نے بتایا کہ انتقال کرنے والا قیدی تھانہ کلر سیداں میں منشیات کے مقدمے میں گرفتار تھا، جبکہ باقی دو قیدی قتل کے مقدمات کے ملزمان ہیں جنہیں اب اسپتال میں زیر علاج رکھا گیا ہے۔جیل انتظامیہ نے واقعے کی اطلاع اعلیٰ حکام کو دے دی ہے جبکہ قیدی کی موت کے اسباب جاننے کے لیے مزید کارروائی جاری ہے۔
