Metro53 - لاہور (ویب ڈیسک) صحافی اجمل جامی کا کہنا ہے کہ حامد میر نے مریم نواز اور شہباز شریف کے اختلاف کی وجہ بننے والے جس واقعے کا ذکر کیا تھا وہ ایک اہم عہدیدار سے متعلق تھا۔
اپنے وی لاگ میں اجمل جامی نے کہا کہ حامد میر کے مطابق پنجاب سرکار نے شہباز شریف سے اہم شخصیت کو اہم عہدہ دلوانے کی سفارش کی، مگر شہبازشریف نہیں مانے۔ حامد میر جو اشارہ کر رہے ہیں وہ ماضی قریب کے ایک اہم ترین عہدیدار اور اہم ترین ادارے کے ذمہ دار کی طرف ہے۔
اجمل جامی کے مطابق جب وہ ریٹائرڈ ہوئے تو ان کی کسی بڑے ملک میں اچھی جاب یا ذمہ داری کی خواہش ہوگی۔ کچھ معلومات ہیں کہ اسکی سفارشیں کی گئی ہونگی، مگر سسٹم انکی ریٹائرمنٹ کے بعد ان سے مزید کام لینے کا خواہاں نہیں تھا ، کیونکہ سسٹم ان کے آخری تین چار ماہ سے کچھ زیادہ مطمئن نہیں تھا۔ ریٹائرمنٹ پر ان سے کہا گیا کہ آپ آرام کریں، گالف کھیلیں، کتابیں پڑھیں۔
اجمل جامی کے مطابق ان صاحب کی جن سیاسی جماعتوں اور سیاسی راہنماؤں سے قربت تھی، انہوں نے ان کے حق میں کمپین بھی کی لیکن اس کا فائدہ نہیں ہوا۔
واضح رہے کہ حامد میر نے کچھ روز پہلے شاہزیب خانزادہ کے پروگرام میں پیپلز پارٹی اور پنجاب حکومت میں جاری لڑائی پر گفتگو کرتے ہوئے کہا تھا کہ اس لڑائی کا اصل ہدف شہباز شریف ہیں کیونکہ انہوں نے کچھ فرمائشیں پور ی نہیں کیں۔
